متحدہ عرب امارات نے پاکستانیوں کیلئے ورک ویزوں کی جلد بحالی کا اعلان کردیا ۔

۔۔۔📰 مکمل خبر ) متحدہ عرب امارات نے پاکستان کے لیے ایک اہم اور خوش آئند اعلان کرتے ہوئے پاکستانی شہریوں کے لیے ورک ویزوں کی بحالی کا عندیہ دے دیا ہے۔ یہ پیش رفت ایسے وقت میں سامنے آئی ہے جب بڑی تعداد میں پاکستانی نوجوان بیرونِ ملک روزگار کے مواقع کے منتظر ہیں۔ تفصیلات کے مطابق پاکستان میں تعینات متحدہ عرب امارات کے سفیر سالم الزابی نے یقین دہانی کرائی ہے کہ پاکستانی افرادی قوت کے لیے یو اے ای کے ورک ویزے جلد دوبارہ جاری کر دیے جائیں گے۔ ان کا کہنا تھا کہ اس حوالے سے تمام ضروری اقدامات مکمل کیے جا رہے ہیں اور حکومتی سطح پر ہوم ورک آخری مراحل میں داخل ہو چکا ہے۔ یہ اعلان یو اے ای کے سفیر نے پاکستان اوورسیز ایمپلائمنٹ پروموٹرز ایسوسی ایشن (POEPA) کے ایک اعلیٰ سطحی وفد سے ملاقات کے دوران کیا۔ وفد کی قیادت چیئرمین پوئپا سید رحمت علی شاہ کر رہے تھے، جبکہ ملاقات میں سیکرٹری جنرل ممتاز صدیق، سابق چیئرمین سید حبیب علی شاہ سمیت دیگر سینئر عہدیداران بھی موجود تھے۔ ملاقات کے دوران سفیر سالم الزابی نے پاکستان اور متحدہ عرب امارات کے درمیان تاریخی، دوستانہ اور برادرانہ تعلقات پر روشنی ڈالتے ہوئے کہا کہ پاکستانی ورکرز نے اپنی محنت، دیانت داری اور پیشہ ورانہ صلاحیتوں کے ذریعے یو اے ای کی ترقی میں نما

یاں کردار ادا کیا ہے۔ انہوں نے کہا کہ اماراتی حکومت پاکستانی افرادی قوت کو قدر کی نگاہ سے دیکھتی ہے۔ سفیر کا مزید کہنا تھا کہ ورک ویزوں کی بحالی کے بعد دونوں ممالک کے درمیان نہ صرف افرادی قوت کا تبادلہ بڑھے گا بلکہ معاشی اور تجارتی تعلقات کو بھی مزید فروغ ملے گا۔ انہوں نے اس امید کا اظہار کیا کہ جلد ہی اس حوالے سے عملی اقدامات نظر آئیں گے۔ اس موقع پر چیئرمین پوئپا سید رحمت علی شاہ نے یو اے ای کے سفیر کی کوششوں کو سراہتے ہوئے کہا کہ ورک ویزوں کی بحالی سے ہزاروں پاکستانیوں کو روزگار کے مواقع میسر آئیں گے، جس سے ملکی معیشت اور زرِمبادلہ کے ذخائر پر بھی مثبت اثر پڑے گا۔ عوامی حلقوں اور اوورسیز روزگار سے وابستہ افراد نے اس اعلان کو خوش آئند قرار دیتے ہوئے امید ظاہر کی ہے کہ یو اے ای میں پاکستانیوں کے لیے روزگار کے دروازے ایک بار پھر کھلیں گے۔